DAVAO CITY – Gatusan ka mga pamilya ug libuan sab ka mga indibidwal ang gikatalang naapektuhan sa mga pag-ulan nga hatod sa shear line. Sumala sa inisyal nga talaan sa Office of the Civil Defense Davao as of 4PM of January 16, anaa sa 552 ka mga pamilya o 2,212 ka mga indibidwal ang apektado diin sa maong ihap, anaa sa 446 ka mga pamilya kon 1,000 ka mga indibidwal ang nagpundo sa evacuation centers.
Gikan sab sa susamang ihap, 336 ka mga pamilya ang anaa sa Davao de Oro; 110 ka pamilya ang gikan sa Davao Oriental; ug 20 ka pamilya ang apektado sa Davao del Sur.
Samtang 13 ka mga lawak ang gikatahong nalunop sa tubig baha sama sa mga barangay sa Doña Josefa ug Aguinaldo sa Laak; Brgy. Sarmiento, New Bataan; Brgy. Nueva Visayas, Bawani, Andili, ug Poblacion, sa Mawab; Brgy. Magading sa Nabunturan; ug Brgy. Poblacion sa Maco, Davao de Oro; lakip na ang sa Brgy. Pansabangan sa Tagum City, Davao del Norte.
Natala sab ang mga pagdahili sa yuta sa Brgy. Camanlangan, New Bataan; Brgy. Linda, Nabunturan ug Brgy. Gubatan, Maco, Davao de Oro.
Daghanan sab nga mga dalan ang dili na maagian partikular na sa Trukat, Camanlangan, New Bataan (Nabunturan – Maragusan Road); Rizal, Monkayo; Sawangan, Mawab; ug Bahi, Maragusan. Nahagsa ang Fatima Bridge, New Bataan, Davao de Oro; ug San Pedro Bridge sa Caraga, Davao Oriental.
Sumala sa datos sa Regional Disaster Risk Reduction and Management sa Department of Agriculture 11, mikabat sa kapin 4,600 na ka ektarya sa kahumayan sa lalawigan sa Davao de Oro ug Davao Oriental ang nangadaot gumukan sa pagbaha.
Sa laing bahin, anaa sa 39 ka mga LGUs sa Davao Region ang nagpagula og suspensyon sa mga klase sa pampubliko ug pribadong tulunghaan.
