DAVAO CITY – Gikumpirma sa BFP 11 nga dunay duha ka menor nga nakabsan sa kinabuhi atol sa niulbo nga dagkong sunog sa Purok Kaunlaran, Brgy. Saloy, Calinan, Davao City.
Giila ang mga biktima nga sila Lex Antiga Romero, 14 anyos; ug Loygie Antiga Romero, 13 anyos; magsuon nga pulos PWDs ug residente sa nahisgutang dapit.
Nasayran nga bandang alas-sais sa gabii, Enero 8, samtang wala pa ang amahan nga si Eliseo Capunong Romero, 37 anyos, sa nadanyos nga panimalay, naobserbahan sa silingan nga usa ka Sergio Camello Juarez, 48 anyos, nga dunay niulbo nga kalayo sa balay sa mga biktima.
Nagpakitabang kini sa mga kasilinganan apan ni-aksyon sab ang mga silingan pinaagi sa pagsulay og palong sa kalayo.
Apan, wala na kini natabang pa tungod gamay ra ang ilang silingan ug layo sa ubang mga kabalayan.
Gama lamang sa mga light materials ang maong balay maong paspas nga nikuyanap ang kalayo ug na-trap sa sulod ang magsuon.
Sumala ni FO3 Jason Iguana, ang Fire Investigator, nakontrola ang sunog sa mga kabumberuhan bandang alas-siyete sa gabii.
Anaa sa kapin kulang P55,000 ang danyos sa insidente nga kasamtangang ginasuta ang hinungdan niini.
