DAVAO CITY – Misaka sa 361 ka mga panimalay ang gitupok sa nahitabong sunog sa may Barangay Leon Garcia, Agdao, Davao City, kagahapon sa kaadlawon.
Subay sa inisyal nga imbestigasyon sa Bureau of Fire Protection-Davao Region, nanukad ang sunog sa nag-overheat nga aircon sa panimalay ni Ron-Ron Asarabia.
Gisulayan og palong sa mga kabumberohan ang maong sunog nga nilungtad og lapas upat ka oras una pa na-under control.
Bandang 7:10 sa buntag na kining nadeklarang fire out sa BFP.
Mukabat sab sa P1.1 million ang gibanabanang danyos sa nahitabong sunog.
Matud pa nga naglisod og sulod ang firetruck sa maong lugar gumikan sa pi-ot nga dalan ug dunay pipila ka mga tao ang nagdinaganay hinungdan nga nakapalangan sa bombero og sulod.
Nitabang na sab ang mga residente sa pagpakgang sa kalayo ug gilayong nga gi contact sa otoridad ang Davao Light aron nga papalong ang koryente sa naasoy nga dapit. Sumala pa nga gama sa light materials ang mga kabalayan hinungdan nga paspas mikuyanap ang kalayo.
Nagpaabot na og hinaling hinabang ang Davao City LGU pinaagi sa ilang CSWDO samtang gipahikling na ang mga apektadong residente sa Congressman Manuel M. Garcia Elementary School, ug basin didto na magsugat og bag-ong tuig sa ilang temporaryong ginapuy-an.
Nagpadayon sab ang ginahimo nga assessment sa mga apektadong pamilya ug indibidwal nga naapektuhan sa maong sunog. Wala sab natala nga nakabsan o naangol sa maong insidente.
Kini na ang ikaduhang sunog nga nahitabo karong bulana sa susamang barangay.
Kahinumduman nga unang niubo ang dagkong sunog sa Brgy. Leon Garcia, Agdao, Davao City nga nitupok sa 11 ka panimalay.
