DAVAO CITY – Nagpaklaro ang Digos City Police nga walay kamatuoran ang nakita nga post sa social media nga dunay bomba nga gisulod og bag dayon gibilin sa dalan duol sa usa ka gasolinahan sa Rizal Avenue, Barangay Zone 1, Digos City, Davao del Sur kagahapon, Disyembre 10.
Sumala pa sa opisyal nga pahayag sa kapulisan, pagsuta sa Provincial Explosive and Canine Unit, diha na napamatud-an nga negatibo sa gidudahang bomba ang packbag nga gibilin atubangan sa usa ka gasolinahan sa naasoy nga dapit.
Nasayran sab nga dili lamang ang ulahing higayon nga nakabalo ang katawhan sa Digos og bomb scare, tungod kahinumduman nga ning nilabayng gabii, adunay nagpakatag sab og sayop nga impormasyon nga dunay bomba ang gibilin nga packbag sa may Poblacion sa susamang dakbayan.
Apan nahibal-an nga nag-unod lamang kini og mga sanina.
Nag-awhag ang Digos Police nga magbinantayon ug di magkompyansa, labi na sa panahon karun daghan nang panghitabo nga bomba sa nag kalaing laing lugar.
Panawagan sab niini nga mahimong sensitibo sa pag-post og pag-share sa mga impormasyon nga makuha ilabi na sa social media aron dili kini mohatag og mali nga interpretasyon.
Sa laing bahin, malipayong gipaambit sa Digos Police ang nasayran nga pagkunhod sa ihap sa 8 focused crimes og 33.33% gikan Oktubre hangtod Nobyembre ning tuiga.
via || Bombo LJF
