DAVAO CITY – Niabot na sa dakbayan ang 16 ka mga estudyante gikan sa Mindanao State University sa Marawi City kagahapong adlawa human sa nahitabong pagpamomba niadtong Disyembre 3.
Malampusong napauli sa ilang mga panimalay ang maong ihap sa ubang bahin sa rehiyon diin lakip niini ang lima gikan Tagum City, tulo sa Davao City, duha sa Digos City, Davao del Sur, Monkayo, ug usa gikan sa Malita, Davao Occidental, ug Mawab, Pantukan, ug Lupon.
Nasayran nga nakadawat og request gikan sa tulunghaan ang City Mayor’s Office, ug nakig-coordinate gilayon kini sa local government units aron ma-verify ang mga estudyante nga gustong mosakay gamit ang sakyanan nga gipagamit sa kagamhanan sa siyudad.
Samtang pipila ka estudyante gikan Davao Region ang hingpit nang nibiya sa maong syudad ug gipiling mahimuyo sa Iligan City o Cagayan de Oro City.
Kasamtangang gisuspinde ang mga klase sa MSU-Marawi pagkahuman sa pagpamomba, nga nagbilin sa lima ka mga tawo nga namatay ug 42 pa ang nasamdan.
Usa ka special investigation task group ang giumol aron madala ngadto sa hukmanan ang mga sad-an.
