DAVAO CITY – Nagtuo ang kapulisan nga dunay lookout sa gitrabahuang establisyemento ang suspek sa pagpamanhig kang kanhi lending firm manager Brain Jupiter kansang napatay kaniadtong nilabayng adlaw.
Sumala sa nakahinabi sa Bombo Radyo Davao nga si PCapt. Archel Calamba, investigating officer sa Tagum PNP, gikumpirma sa opisyal nga riding in tandem ang nagpatay sa 32 anyos nga kanhi manager paggawas niini sa gitrabahuang opisina sa Magugpo West, Tagum City, Davao del Norte.
Gikumpirma sab ni PCapt. Calamba nga bag-uhay pa lamang nihawa ang biktima sa iyang katungdanan diin anaa pa lamang sa upat ka semana ang nakalabay. Dugang pa sa mga nasayran atol sa imbestigasyon, dunay anggulong kasuko sa mga nalambigit sa krimen gumikan sa nadispalko nga kwarta sa propesyonal, sigon sab sa pakighinabi niini sa iyang ka-ipon.
Dali sab nga misibat ang suspek niadtong tungura human sa krimen samtang nakarekober ang mga taga-SOCO og 6 ka fired cartridges sa punto 45 nga pistula sa crime scene.
Giangkon sab ni PCapt. Calamba nga dakong hagit alang kanila ang pagtumbok sa suspek sanglit nagsuot kini ug helmet. Naghangyo na sab ang kapulisan ngadto sa tulo ka mga establisyemento duol sa crime scene lakip ang kanhi trabahuan sa biktima nga maghatag og CCTV footage atol sa insidente.
Ning kasamtangan, wala pa nagpasaka og kaso ang Tagum PNP sa mga suspek nga nagpabiling at large karong panahuna.
Sa laing bahin, gumikan sa insidente sa pagpamusil patay kang Jupiter, gipahugtan sa Tagum PNP ang ilang pagbantay ilabi na sa umaabot nga BSKE 2023.
Sumala kang PCapt. Calamba, nagpadayon ang ilang hugtanong checkpoints sa halos tibuok syudad ingon man pagpanghatag og silot sa mga makasupak sa COMELEC Gun Ban.
Ning kasamtangan, walay namonitor nga mga gun for hire groups diha sa Tagum Cuty. Sa kaso sa gilungkab nga dagkong mall ning nilabayng bulan, gikumpirma sa Tagum PNP nga duna nay persons of interest ang kapulisan ug naghulat na lamang og kamanduan alang sa pagpasilot sa usa ka grupo nga nalambigit sa maong krimen.
