DAVAO CITY – Mukabat sa 182 ka mga gagmayng rice retailers sa Davao Region ang mahatagan og kinse mil pesos nga cash aid ilawom sa Sustainable Livelihood Program kon SLP sa DSWD 11 sugod kagahapon Setyembre 13 hangtod karong adlawa, Setyembre 14.
Sumala ni Florlito Alaba, DSWD SLP partnership officer, naglakip sa maong ihap ang 58 ka mga micro-rice retailers dinhi sa dakbayan nga gikan pa sa Agdao, Bankerohan, Calinan, Mintal, Panacan, and Toril. Kagahapon, niabot sa 24 ang nahatagan og ayuda nga anaa sa P360,000.
Gikabutyag ni Romeo Castañaga, DTI-11 assistant director, ang maong ihap sab ang subay sa gihimo nilang monitoring kaniadtong milabayng simana.
Dugang pa sa opisyal nga dili na mamahimong mosubra sa P15,000 ang ilang madawat nga cash aid tungod nahisubay kini sa ilang kwenta sa ilang pagkalugi sulod sa pito ka adlaw human giimplementa ang EO 39.
Gipahigayon sab sa ubang lugar sa rehiyon ang nasangpit nga pay-out diin gikinahanglan ang mga retailers nga magdala sa ilang business permit, ug tag-usa ka original ug photocopied valid ID alang sa verification.
Kinahanglan sab nga mupasailawom sa interview ang mga benepisyaryo ug pirmahan ang SLP profile form una pa madawat ang ilang cash assistance.
Gikatakdang i-monitor sa DSWD ug DTI ang mga retailers aron masiguro nga mapaigo og sakto ang ilahang nadawat nga ayuda.
Gikatakda sab nga magpahigayon og iskedyul alang sa second batch nga makadawat niini atol sa nagpadayong identification sa DTI 11.
Samtang magpadayon hangtod karong adlawa ang pagpanghatag og kinse mil pesos alang sa mga rice retailers nga ipahigayon sa Almendras Gym ning dakbayan.
via || Bombo LJF
