DAVAO CITY – Gibarugan sa Police Regional Office 11 nga nagpabilin ang pagresponde sa bisan unsang kriminalidad ang kapulisan sa Davao Region nunot kana sa pagpatanggal sa PNP sa ilahang quota system.
Matud pa ni PRO 11 Spokesperson PMaj. Catherine dela Rey ngadto sa Bombo Radyo Davao, gipaningkamutan sa kapulisan nga mapadali ang paghatag og resolusyon ingon man ang pagpatuman sa standard operating procedures alang sa hinaling kasulbaran sa mga kaso.
Gipasalig sa tigpamaba nga dili sila magpakumpyansa sa ilang pag-alagad sa komunidad pinaagi sa mas gipahugtang pagpatrolya ilawom sa kamanduan ni PRO 11 Regional Director PBGen. Alden Delvo nga police visibility, ug magpabiling kasaligan ang kapulisan sa rehiyon sa pagtubag sa bisan unsang krimen nga magpahinabo sa rehiyon.
Buot sab ipasayod sa tigpamaba nga bisan pa man dunay quota system nga mipatigbabaw, wala matud pa panumbalingan kini sa Pulis Dabaw.
Bag-uhay lamang nga gipahawan ang quota system ni PNP chief Gen. Benjamin Acorda Jr. ug ang hugot nga pagpahigayon og law enforcement operations aron maaresto ang mga nalambigit sa krimen.
Una nang gikabutyag sa PRO 11 nga nikunhod og 16 percent ang crime rate sa rehiyon karong tuiga diin anaa lamang sa 650 ang natala gikan Enero hangtud Hulyo ning tuiga kon itandi sa 776 sa susamang panahon sa milabayng tuig.
via || Bombo LJF
