DAVAO CITY – Gideklarar sa Provincial Government sa Davao Oriental ang panahon sa pagbangotan kon period of mourning sa pagtaliwan ni Governor Corazon Malanyaon.
Giisyu sa bag-ong gobernador sa probinsya nga si Niño Sotero Uy ang Executive Order 1 niadtong Hunyo 30, nga gipatuman sukad sa Hunyo 29 ngadto sa Hulyo 7, kon ang adlaw nga ihatod sa ulahing kapahulayan si Malanyaon.
Si Uy, kinsa mipuli kang Malanyaon, midayeg sa iyang mga nahimo isip usa ka public servant, apil na ang probinsya nga gihatagan ug Seal of Good Housekeeping ug Seal of Good Local Governance Award for Breakthrough in Local Governance.
Nahimo sab nga nagmalampuson ilawom sa iyang pagpangatundanan ang pagmugna sa Mt. Hamiguitan Range Wildlife Sanctuary isip World Heritage Site sa UNESCO ug sa pagkompleto sa Cateel Irrigation Project, nga gikonsiderar nga pinakadakong irigasyon sa Mindanao.
Kahinumduman nga nitaliwan ang gobernadora niadtong Hunyo 28, 2023, sa edad nga 73.
Gilagak ang patayng lawas ni Malanyaon ning kasamtangan sa Kapitolyo sa Mati City ug gikatakdang ibalhin kini sa iyang yutang natawhan sa Cateel sugod karong adlawa, Hunyo 4 hangtod 6.
Samtang ihatod kini pagbalik sa Davao City aron ilubong sa Davao Memorial Park karong Hulyo 7.
via || Bombo LJF
