DAVAO CITY – Patay on the spot ang usa ka 24-anyos nga babae human nga naligsan sa usa ka wing van pasado alas nuebe ang takna kagabii sa Mc Arthur highway, Brgy. Dumoy ning dakbayan sa Davao.
Sa report gikan sa kapulisan naila ang biktima nga si Lyra Martin Marcito, dalaga ug residente sa Saliao Esperanza,Sultan Kudarat. Samtang ang driver sa Isuzu wing van Renato Maratas Garciano, 51-anyos, minyu nga taga Mangagoy, Bislig, Surigao del Sur.
Subay sa imbistigasyon sa traffic section sa Baliok PNP ang usa ka wing van ang nagsubay sa Mc Arthur Highway nga anaa sa inner lane gikan sa Toril padulong sa downtown area, apan pag-abot sa Crossing sa Mc Arthur Highway kalit lang nga nabanggaan ang biktima nga niadtong tungura bag-o lang natigayon ang kusog nga bundak sa ulan.
Tungod sa nahitabo patay on the spot ang 24-anyos nga babae nga girespondehan sa BDRRMC of Brgy. Aplaya. Tungod sa hitabo naus-os pa ang long pants niini nga suot atol sa pagkabangga.
Nasayran nga ang biktima ang bag-ohay lang nga nakapasar sa medtech exam. Sa karon ang driver sa truck ang anaa na sa kostudiya sa Baliok PNP.
