DAVAO CITY – Lima ka person of interest, ang gilantaw karon sa mga kapulisan, mahitungod sa kasong paglugos-patay sa 28 anyos nga arkitek nga si Vlanche Marie Bragas, kinsa nakaplagan na lamang ang patay’ng lawas niini sa usa ka banana planation niadtong Mayo 18.
Kini ang gibutyag sa tigpamaba sa Police Regional Office (PRO-XI) nga si Lt. Col. Atty Eudisan Gultiano sa eklusibong pakighinabi sa Bombo Radyo Davao.
Matud kaniya nga ning kasamtangan, padayon gihapon ang back-tracking ug pag-subay sa mga footage nga nakuhaan sa CCTV sa lugar hain miagi ang bao-bao nga gisakyan sa biktima.
Nanawagan usab ang opisyal ngadto sa usa ka pasahero, nga nakitaan sa CCTV nga misakay bandang alas 10:35 sa gabie, Mayo 16 sa maong b ao-bao ug minaog kini sa “Driving Area” sa Calinan ayha gi-pick up sa maong drayber si Arch. Bragas.
Hangyo sa opisyal, nga mupatim-aw ang nahisgutan sa pag-laum nga mahimo na kining yawe o lead nga makatudlo sa suspek.
Kasamtangan, padayon pa ginasuta sa kapulisan ang pagkatawo sa suspek.
Dugang pa ni Col. Gultiano, nga subay sa nakuhaang CCTV footage, dili klaro sa kopya ang nawong sa drayber sa yellow nga ombak sanglit padayon pa nila kining gi-enhance.
Subay sa imbestigasyon, paglugos-patay ang nag-unang tumong sa suspek ngadto sa biktima , tungod narekober pa sa kapulisan ang mga kagamitan ni Bragas.
Sa pikas bahin, Una na mitanyag si 1st District Congressman Paulo “Pulong” Duterte og usa ka milyones nga pabuya alang sa kinsa man makahatag og impormasyon kabahin sa drayber sa maong bao-bao.
Samtang, dako usab ang pasalamat sa Police Regional Office-XI sa nahimong tanyag ni Pulong nga usa ka milyones nga pabuya, alang sa katuyoan nga mapapaspas ang kaso, aron sa gilayon usab makab-ot sa nahabiling pamilya sa biktima ang hustisya.
via || Bombo HJR
