DAVAO CITY – Gikabutyag sa usa ka myembro sa press ang mga kalisdanan nga nasinatian sa mga myembro sa midya sa pagpadayag og kamatuoran sa katawhan.
Sa ekslusibong pakighinabi sa Bombo Radyo Davao, gikanayon ni Amalia Cabusao, editor-in-chief sa Mindanao Times, gawas sa gikabalak-ang pagnihit sa ihap sa mga journo sa mantalaan ug ang pagbalhin sa digital media, ug pang-harass sa pipila ka mga myembro sa midya, nagpabilin gihapon ang hagit sa misinformation and disinformation dungan sa pag-tubo sa social media.
Ilabihan sab nga gikabalak-an ang bahad sa kinabuhi sa pipila ka mga journalists nga nagpahinabo gihapon sa kasamtangang panahon.
Matinud-anon sab nga gikanayon ni Cabusao nga dunay risgo ang mamahimong mamamahayag dinhi sa nasud nga makita sa pipila ka mga journo nga gipamatay sa pipila ka bahin sa nasud, ilabi na ang nahitabong Maguindanao Massacre niadtong 2009 diin 32 ka mga media workers ang nakutluan sa kinabuhi.
Apan taliwala sa mga hagit, gipaningkamutan sa mga journo nga magbaton og etika sa pamahayag alang sa pagpakaylap og kamatuoran.
Kahinumduman nga niadtong Mayo 3, dungan sa paghimumdom sa World Press Freedom Day, ang paglusad sa Davao Citizens Media Council nga gilangkuban sa mga myembro sa mantalaan, sibyaan, ug uban pang midya nga nagtumong sa pagmugna og mekanismo nga pagpromotar sa kagawasan sa pamahayag, proteksyon sa mga journo alang sa responsableng pamahayag, ug ang pagpangake sa press pinaagi sa ginapasakang libel cases.
via || Bombo LJF
