DAVAO CITY – Gibutyag sa Department of Agriculture in Davao Region (DA-Davao) nga naka-export na ang buhatan og kapin 200,000 kilograms nga durian sa China nga nagsugod kaniadtong Abril 6, ning tuig.
Matud pa ni DA-Davao regional director Abel Monteagudo nga padayon pa nilang gina-verify ang halin sa exportation sa maong prutas apan giklaro usab niya nga ang retail price sa Durian nga gi-export, anaa karon sa P100 hantud P200. Ning kasamtangan usab, ang mga kalihokan sa pag-eksport mahimong mohunong tungod kay ang pag-ani sa durian sa Davao nagkaduol na sa iyang off-season apan laraw sa buhatan nga makabalik sa Agosto ning tuiga ang exportation sa laing 200,000 ka kilo.
Dugang pa niana, majority sa first batch sa exportation gikan sa Davao City apan ang ikaduhang batch magagikan sa nagkalain-laing farms gawas sa Davao City diin anaa sa 20 sa 50 ka farm associations ang kwalipikado alang sa unang batch sa accreditation.
