DAVAO CITY – Usa ka 9 anyos nga batang babaye nga unang gikatahong nawala ang napalgang patay sa Purok Durian, Apokon, Tagum City, Davao del Norte, bandang alas-7:45 sa gabii.
Giila sa mga otoridad ang maong patayng lawas nga si alyas “Monalisa”.
Sigon sa report, naghatud lamang sa iyang manghud nga nagtungha Apokon Elementary School ang batang biktima kaniadtong Abril 17, bandang alas-6:30 sa buntag.
Nagtuo ang pamilya nga dali lamang makauli si Monalisa, sanglit gagmayng distansya lamang ang gikahimutangan sa ilang panimalay duol sa iskwelahan.
Naghulat ang amahan sa biktima aron dungan silang mamahaw, apan pipila na ka oras ang milabay, wala na nakabalik ang batang babaye gikan sa tulunghaan.
Nagpakitabang ang amahan sa Tagum City Police Station aron pangitaon ang iyang anak.
Apan human sa pipila ka adlaw, nakit-an si Monalisa nga nagbuy-od na lamang nga wala na’y kinabuhi sa sagbutang bahin sa maong dapit.
Gikumpirma mismo sa amahan ang nadugta nga patayng lawas ni Monalisa. Natimahuan sab sa mga residente ang patayng lawas niini una pa man siya naplagan sa kapulisan.
Nagpahigayon na ang Tagum City Police og halawom nga imbestigasyon sa kamatayon sa biktima.
via || Bombo LJF
