DAVAO CITY – Nangilabot na ang Department of Education – Davao mahitungod sa insidente sa usa ka Kindergarten pupil sa Barangay Lacson, Calinan ning dakbayan nga nalaksian og papel sa iyang maestra diin gibutyag kini sa ginikanan sa estudyante pinaagi sa social media.
Sa pakighinabi sa Bombo Radyo Davao kang Jenelito “Dodong” Atillo, ang tigpamaba sa DepEd-Davao, gikabutyag nga nagpadala na og suwat ang bag-ong Schools Division Superintendent nga si Dr. Reynante Solidario ngadto sa tigdumala sa Lacson Elementary School sa Barangay Calinan ning dakbayan aron maglusad og imbestigasyon.
Sa karon, gipaabot pa sa DepED Davao ang resulta sa imbestigasyon sa insidente nga nahitabo sa nasangpit nga tulonghaan.
Niapela sab ang tigpamaba sa DepED 11 ngadto sa publiko nga personal nga ipadangat una sa tulunghaan ang bisan unsang suliran tali estudyante ug ginikanan aron mahatagan og kasulbaran, ug dili sab kini basta-basta ipasibaw sa social media.
Dugang pa sa opisyal nga lugwayan unta sa publiko ang pagsabot sa mga kahago nga nasinatian sa mga magtutudlo.
Nasayran nga nakahinabi na sa ginikanan pinaagi sa chat ang maestra nga nalambigit sa maong insidente.
Subling gibarugan sa wa giilang magtutudlo ang maong aksyon, sanglit iyaha kining pamaagi aron madisiplina ang maong Kindergarten pupil.
via || Bombo LJF
