DAVAO CITY – Gikabalak-an sa Davao City Anti-Drug Abuse Council ang nagkabatang pangidaron sa mga naggamit og ilegal nga bisyo.
Gikanayon ni Ronaldo Rivera, technical adviser sa CADAC, namatikan karon ang nagkabata nga mga biktima sa droga, sigarilyo ug alkohol.
Sumala sa natigayong survey sa 65 children in conflict with the law sa Balay Pag-asa ug Sidlakan Center, anaa sa 8 ngadto 14 anyos ang pangidaron sa mga bata nga na-expose sa ilimnong makahubog.
Samtang, nasa 13 hangtod 14 anyos nga mga batan-on ang sayo nang nagapanigarilyo. Nasa 9 anyos ang pinabatang na-expose sa paggamit og marijuana.
Naggagikan sa 14 hangtud 15 anyos ang idad sa mga nagsinghot og solvent, ug nasa 13 hangtud 16 anyos ang pangidaron sa mga naggagamit og gituohang shabu.
Nigawas sab sa susamang survey nga 37 ka mga kaso sa mga children in conflict with the law ang nagkanayon nga gikan sa impluwensya sa ilang mga pamilya ang ilang paggamit og ilegal nga substance.
Giawhag karon sa ahensya ang mga magbabalaud sa dakbayan nga magmugna og mga ordinansa batok sayo sa pagbaton og drug abuse ngadto sa mga kabatan-onan.
via || Bombo LJF
