DAVAO CITY – Gikabalak-an ni Davao City 2nd District Councilor Marissa Salvador-Abella ang estado sa industriya sa abaca dinhi sa dakbayan.
Sa iyang privilege speech, gipasibaw sa konsehal ang kasamtangang sitwasyon sa dos mil ka mga mag-uuma sa abaca sa Paquibato nga matud pa napurdoy gumikan kay wala nahalin tungod sa ubos nga kalidad niini.
Pagbutyag sab ni Abella nga nagpadala og suwat ang Philippine Fiber Industry Development Authority kaniadtong Oktubere 2022 nga nag-abiso nga hunungon na ang pagkumpra sa Abaca gikan Davao City.
Dugang pa, dili pasado sa world standards ang Daratex variety sa abaca nga sagad ginatanom sa mga mag-uuma nga gitandi nga mas ubos kaysa sa ubang klase sa abaca sama sa Tangongon ug Inosa.
Tungod niini, nakahukom na lamang ang mga mag-uuma nga putlon na lamang ang mga punuan sa abaca.
Gipapalihok na karon ni Abella ang usa ka ordinansa sa dakbayan nga magmugna og Abaca Seed Program ug Tissue Culture Laboratory alang sa abaca industry sa dakbayan aron makaprodyus og maayong kalidad sa abaca.
Nangayo sab kini og technical assistance sa University of Southern Mindanao kon USM.
Samtang giawhag una ni Abella ang mga abaca farmers sa Paquibato og uban pang tanon aron magpabiling buhi ang ilang panginabuhian samtang ginahulat na lamang ang pagpatuman sa maong proyekto.
via || Bombo LJF
