DAVAO CITY – Laraw karon sa lokal nga panggamhanan sa Lupon, Davao Oriental nga subling ablihan ang ilang ferry port sa tinguha nga makatabang kini sa pagpalambo sa ekonomiya sa lugar ingon man mapakusgan ang connectivity sulod diri sa Rehiyon Onse.
Kini mismo ang resulta sa gipahigayong panagpulong tali ni Davao City Mayor Sebastian “Baste” Duterte ug Lupon Mayor Erlinda Lim diin nahisgutan ang re-opening sa Lupon-Davao City Passenger Ferry Route.
Ginalantaw nga pinaagi sa pagbalik sa ferry route, makunhuran ang travel time gikan Davao City paingon sa Lupon ug vice versa nga mulungtad lamang og hangtud usa ka oras ug 20 minutos.
Gisuportahan usab kini ni Mayor Baste ug misaad og lugar nga magsilbi isip docking site alang sa mga barko diri sa syudad.
Gawas sa Rehiyon XI, ang pag-abli sa ferry port ang makatabang sab sa ekonomiya sa ubang kasikbit nga lugar sa Lupon tungod lauman nga makadani kini og dugang nga mga turista nga mudayo sa maong dapit pinaagi sa paspas , komportable , ug hapsay nga pagbiyahe.
