DAVAO CITY – Hugot gimonitor karon ang suplay sa mainom nga tubig sa mga evacuation centers sa Davao De Oro. Nasayran nga siyam ka mga evacuation centers sa Davao De Oro ang nagkinahanglan og limpyo ug luwas nga mainom nga tubig.
Sa nasangpit nga ihap, lima ka evacuation center ang anaa sa Maco, tulo sa Nabunturan ug usa ka evacuation center ang anaa sa New Bataan. Sumala sa taho gikan sa Regional Disaster Risk Reduction and Management Council (RDRRMC) ang mainom nga tubig ang usa sa mga nag-unang gikinahanglan sa mga biktima sa linog nga gihikling karon sa mga evacuation centers sa probinsya.
Base sa report sa RDRRMC, sukad Marso 12, mukabat sa 70 ka mga barangay sa Davao De oro ang naapektuhan sa linog diin 6,720 ka mga pamilya o 31,120 ka mga indibidual ang apektado. Sa nasangpit nga ihap, 1,826 ka mga pamilya o 7,923 ka mga indibidwal ang anaa karon sa mga evacuation centers. Samtang, nagpadayon usab ang pab-abot sa mga hinabang o mga relief operations gikan sa nagkalain-laing probinsya ug syudad.
Malampuson sab nga nakapang-apud-apod ang Department of Social Welfare and Development (DSWD 11) og mga ayuda ngadto sa mga katawhan sa Sitio Kilabot sa Barangay Ngan, Compostela, ug Barangay Prosperidad, Montevista , Davo De Oro. Lakip sa mga gipanghatag sa ahensya mao ang pagkaon, tabang pinansyal, ug ubang pang panginahanglanon aron masiguro nga makadawat ang matag pamilya og saktong tabang nga ilang gikinahanlan.
