DAVAO CITY – Patay ang tulo ka magparyenteng minero human nga mahilo sa gas sulod sa ilang gitrabahuang mining tower sa Purok 50, Diat, Barangay Napnapan, Pantukan, Davao de Oro, niadtong Sabado.
Gilla ang mga biktima nga sila Jelbert Lastimado, 25 anyos; Arjie Jayson, 23 anyos; ug si Julito Torifel, 25 anyos, nagpuyo sa Purok 2, Barangay Tibagon, Pantukan, Davao de Oro.
Sumala sa report sa Pantukan PNP, nakasim-ot ang mga biktima og usa ka klase sa gaseous poison sulod sa gitrabahuan nilang tunnel.
Matud pa, gi-rescue sa duha ka kaubanan ang usa ka biktima nga nawad-an og panimuot sulod sa tunnel, apan nahilo sab kini pagkadugayan hinungdan sa ilang kamatayon.
Nasayran sab nga bag-uhay lamang silang nahimong trabahante sa maong minahan. Kasamtangan nang gilagak ang ilang patayng lawas sa ilang mga tagsa-tagsa ka tagtungod.
