DAVAO CITY – Gikabutyag sa Provincial Disaster Risk Reduction and Management Office sa Davao de Oro nga masinati na lamang ang nihit nga mga aftershocks sa probinsya human sa pipila ka mga natalang pagtay-og human sa makusog nga magnitude 5.9 nga linog kaniadtong Martes, Marso 7.
Taliwala pa niana, nagpadayon gihapon ang information campaign sa buhatan nahitungod sa mga angayng buhaton panahon sa linog.
Sa pakighinabi sa Bombo Radyo Davao kang Engineer Allen Baco, Operations and Warning in Charge Officer sa buhatan, iyang gikanayon nga importante nga mapangandaman ang maong katalagman nga sagad mahitabo sa dili masayrang panahon.
Sa wala pa mag-linog, siguruhon nga luwas ang mga balay ug gambalay sa lugar.
Habwaon ug iplastar sa pinakaubos nga lugar ang mga mabuak nga mga butang sama sa plato ug ubang gamit nga gama sa glass, lakip na mga mga delikadong kemikal nga daling masunog.
Importante sab ang pagbutang og exit points sa matag gambalay aron dali lamang kining maadtuan sa mga bata, tigulang, mabdos ug PWDs.
Importante sab nga magpundo og emergency supplies ug first aid kit. Samtang panahon sa pagtay-og sa yuta, mamahimong kalmado, ug himoon ang duck, cover and hold procedure, o magtago ilalom sa lig-on nga lamisa aron maprotektahan ang ulo sa mga mahulog nga kabtangan.
Mamahimo sab nga muadto sa hawan, taas ug luwas nga lugar.
Pagkahuman sa linog, i-check ang kaugaalingon ug mga kaubanan kon nasamdan kini.
Magpaniid sa palibot sa bisan unsang butang nga maghatod og peligro. Musunod sa mga otoridad alang sa posibleng evacuation, ug labaw nga mag-igmat sa mga posibleng aftershocks.
Nag-awhag sab ang PDRRMO sa katawhan nga musalmot sa mga kalihukan sama sa earthquake drills ug seryosuhon ang pagbuhat sa mga angayng buhaton alang sa kaluwasan sa kaugalingon, pamilya ug katilingban panahon sa linog.
via || Bombo LJF
