Nakatigom ang probinsya sa Davao Del Norte og pondo nga mukabat sa Php 58,582,500 gikan sa Department of Social Welfare and Development (DSWD) alang sa pagpatuman sa Risk Resiliency Program, pinaagi sa Cash-for-work in Climate Change Adaptation and Mitigation Program karong tuiga. Sumala ni Davao Del Norte Governor Edwin Jubahib, ang nasangpit nga pondo dili lamang makahatag og dugang nga kita sa mga constituents niini, apan makatabang usab kini sa pag-atiman sa kinaiyahan nga apektado karon sa Climate Change. Mapasalamaton usab si Jubahib ngadto sa DSWD tungod sa Cash-for-work program nga tumong makahatag og economic stability ug disaster resiliency sa mga komunidad. Dugang pa, makahatag usab kini og dugang nga oportunidad sa mga pamilya nga apektado sa katalagman , kinsa sagad madisplaced kon maigo man kini sa ilang lugar. Karong Marso, muabot na sa 15,000 ang benepisyaro sa maong programa, kinsa makadawat matag adlaw og sweldo nga Php 438 o kinatibuk-ang Php 4,380 sulod sa napulo ka mga adlaw.
