DAVAO CITY – Nagmugna ang National Economic and Development Authority (NEDA 11) og usa ka espesyal nga chapter nga mu-focus sa paghimo sa Davao city isip usa ka logistic hub sa Southern Philippines. Suma ni Maria Lourdes Lim, regional director sa NEDA 11, aron makab-ot kini kinahanglan mutukod og usa ka integrated intermodal transport system sa syudad samtang ipadayon ang pagpalambo sa mga pasilidad sa imprastraktura ug ang logistik sa rehiyon. Alang kang Lim, ang pito ka mga dagkong proyekto sa syudad mamahimong makab-ot ang usa ka intermodal transportation system , ilabi na sa mga dapit sa Davao Gulf , diin ang Metro Davao mahimong isip usa ka logistic hub susuma sa Singapore. Lakip sa mga dakong proyekto sa syudad nga ipatuman alang sa ikalambo mao ang Sasa Wharf Rehabilitation Project, Davao International Airport Modernization Project, Davao City Coastal Road Project, Davao City Bypass Road Project, Davao City Expressway Project, Samal Island-Davao City Connector Project, ug Mindanao Railway Project: Tagum-Davao-Digos segment.
