DAVAO CITY – Gikatakang ipahigayon ang Davao Regional Athletic Association kon DAVRAA Meet sa probinsya sa Davao de Norte karong tuiga human sa tulo ka tuig nga pagkahunong gumikan sa pandemya.
Nakigpulong na ang mga opisyal sa Department of Education XI sa panguna ni Schools Division Superintendent sa probinsya ug Regional Director Allan Farnazo, ug ang lokal nga kagamhanan sa pagpanguna ni Governor Edwin Jubahib aron hisgutan ang mga katikaran nga ipahigayon atol sa pag-host sa probinsya sa nasangpit nga regional athletic meet.
Gikanayon ni Jubahib nga dagkong dungog kini alang sa probinsya nga manguna alang sa DAVRAA Meet nga magpakita sa kahanas sa mga atleta sa tibuok Davao Region.
Gilaumang salmutan sa kapin 8,000 ka mga atleta, coaches ug opisyal gikan sa mga school divisions sa tibuok rehiyon ang usa sa pinakadagkong panagtapok sa mga bag-ong future stars sa Philippine Sports.
Pagasugdan ang DAVRAA Meet 2023 karong Abril 24 hangtud 28 ning tuiga sa Davao del Norte Sports and Tourism Complex sa Tagum City.
VIA || Bombo LJF
