DAVAO CITY – Gikumpirma sa Health and Nutrition Section sa Department of Education – Davao nga muabot na sa lapas dos syentos ang mga kaso sa Hand Foot and Mouth Disease gikan sa mga managlahing iskwelahan sa Davao City.
Sumala sa medical officer sa DepEd Davao na si Dr. Ritchelle Aresco, anaa sa 232 ka mga magtutuon ang gituohang natakdan sa maong sakit sugod pa kaniadtong Enero ning kasamtangang tuig.
Gawas pa niana, nasa 6 na ang kumpirmadong kaso sa HFMD, ug duna pay gikatuohang 2 ka kaso gikan sa Teaching & Non-Teaching Personel, samtang 5 ang dunay probable cases nga mga estudyante.
Gikabutyag sa buhatan nga dili sila basta-basta maka-diagnose sa maong balatian busa tambag nila nga magpakonsulta sa pinakaduol na barangay health center o pribadong ospital.
Nagpahinumdom sab ang DepED sa mga estudyante na kon ugaling makasinati og sintomas sa sakit sama sa hilanat, pagpanakit sa baba gumikan sa sores, ug skin rashes sulod sa napulo ka adlaw, temporaryong mubalik sa modular class ug dili una musulod sa tulunghaan.
Ang Hand-foot-and-mouth disease, usa ka hinay apan makatakod nga sakit nga makuha gikan sa coxsackievirus virus ug kasagarang mataptan niini ang mga kabataan gikan 5 anyos ang pangidaron.
via || Bombo LJF
