DAVAO CITY – Wala gikahimuot sa mga netizens ang gibuhat sa usa ka prankster sa Mawab, Davao de Oro. Sumala sa pagsaysay sa MDRRMO Mawab, pasado ala-una kagahapon, nipalit og gasolina ang maong vlogger sa usa ka gasolinahan.
Human niana, gilaklak niini ang usa ka bote sa gituohang gasolina nga gikaalarma sa mga trabahante sa maong gasoline station.
Nagpakitabang ang mga personahe sa gasolinahan ug gilayong miabot ang mga sakop sa MDRRMO Mawab, ug naabtan pa nilang dunay nagsuka-suka ug nagpakaaron ingnong nga dunay giagiang problema.
Apan pagpangutana sa emergency team nga kon mamahimo ba silang dalhon sa ospital, nagdumili ang vlogger og puno sa pangomedya nga nagtug-ang usa lang diay kini nga prank.
Nasayran nga ang nagbuhat sa maong makalisang nga prank,myembro sa grupong Cordero Brothers. Nigawas sab nga dili gasolina ang giinom sa maong vlogger apan usa diay ka energy drink.
Gikanayon ni Mawab MDRRM Officer Ruel Helicame nga gireport na sa kapulisan ang maong insidente nga posibleng mag-atubang ug kasong administratibo ang tawo nga nagbuhat sa maong prank.
Nagpahimangno ang MDRRMC Mawab ngadto sa mga vloggers nga likayan ang pagbuhat ug mga susamang pranks nga may kalabutan sa emerhensiya.
Matud pa, wala gibawalan ang pagbuhat og mga makalingaw nga content, apan dili idamay ang mga emergency concerns nga magmugna og panic ug kabalaka ngadto sa publiko.
via || Bombo LJF
