DAVAO CITY – Pagasugdan na ang construction sa Mindanao Railway Project sa unang bahin sa tuig 2023.
Sumala sa report sa Panabo City Information Office, nakigpulong na ang ang mga komitiba sa Resettlement Planning and Implementation, Site Selection and Development alang sa pag-implementa sa maong proyekto nga adunay gitas-on nga 100.2 kilometers.
Sumala sab sa Department of Transportation, lauman sab sa susamang panahon ang pagpalambo ug paghan-ay sa resettlement site nga kabalhinan sa mga residenteng maigo sa MRP.
Nahilakip niini ang 91 ka mga pamilya nga informal settlers gikan sa mga Barangay sa Datu Abdul, Little Panay, Maduao, New Visayas, Quezon, Southern Davao ug Barangay Tagpore; diin ipangbalhin sila sa relocation site sa Barangay Maduao, Panabo City.
Lakip sa gihigutan sa maong panagpulong ang paghimo sa Local Inter-Agency Committee og mga resolution nga kinahanglanon sa pagsugod sa maong proyekto sa siyudad sa panguna ni Panabo City Mayor Jose Relampagos.
Gitunga ang maong proyekto sa tulo ka phases nga magkonekta sa pipila ka mga parte sa Mindanao.
Ang Tagum-Davao-Digos stretch sa MRP Phase 1, adunay distansya nga 105 kilometers nga magpadali sa pagbyahe gikan Davao del Norte hangtud Davao del Sur sulod sa lapas usa ka oras gikan sa tulo ug tunga ka oras nga travel time. Aduna sab kini walo ka mga stops nga itagana sa Tagum, Carmen, Panabo, Mudiang, Davao Terminal, Toril, Sta. Maria ug Digos.
Kahinumdumang gipanaad ni President Ferdinand “Bongbong” Marcos atol sa pinakaunang SONA nga ipalihok ang plano alang sa MRP sa iyang termino diin gipakanaog ang mando ngadto sa DOTr nga ipadayon ang mga loan negotiations uban ang China aron mapundohan ang maong proyekto isip kabahin sa Build, Build, Build Program sa nakalabayng administrayon.
via || Bombo LJF
