DAVAO CITY – Libuan ka mga Dabawenyo ang nahatagan ug pinaskuhan kagahapong adlaw sa Pasko atol sa nibalik nga gift-gibiong ceremony sa Duterte family nga Pahalipay sa Taal nga ginapahigayon sa ancestral house sa pamilyang Duterte nga nahimutang sa Taal, Bangkal, Brgy. Talomo Proper, Davao City.
Kagabii pa lamang, ubay-ubay na ang nag-atang sa gawas sa tugkaran sa mga Duterte aron makakuha na ug mga pinaskuhan diin kasagaran sa ila, dugay nang nagapaabot nga makadawat sa ilang mga pinaskuhan human sa pagkahunong niini gumikan sa pandemya.
Sa ilang pag-hulat, dunay mga gipangkuyapan, maski bata, hamtong, tigulang ug mabdos, walay nibiya sa taas nga pila ug gidaghanon sa mga tawo taliwala sa init nga panahon, mahatagan lang ug pinaskuhan gikan sa mga Duterte.
Nakadawat ug gift packs ang mga nisalmot nga nag-unog og tulo ka kliong bugas, mga delata, P300 gift certificate, lakip ang P150 nga reimbursement sa pamasahe, giabaga na sa mga Duterte.
Una na gilauman sa Davao City Police Office nga muabot sa kapin kulang 40,000 ka mga tawo ang muadto sa lugar.
Gilangkoban kini sa mga bata, batan-on, mabdus, hamtong ug mga senior citizen ang mitungha sa buot nga mahatagan og pahalipay gikan sa Pamilyang Duterte.
via || Bombo DMB, Bombo HJR & Bombo LJF
