DAVAO CITY – Apektado ang anaa sa kinse ka mga barangay ug mukabat sa dul-ang nasa bayte syete mil ka mga indibidwal o gibana-banang nasa 70% sa kinatubuk-ang populasyon sa lungsod sa Malalag, Davao del Sur atol sa kusog nga pag-uwan nga hatud sa Low Pressure Area niadtong Huwebes.
Nagpakatag na ug mga personahe ang lokal nga panggamhanan aron magpahigayon ug rescue operations sa mga nabahaang lugar sa lungsod.
Kasagaran sab sa mga pamilya nga nahimuyo nga duol ug nasa danger zones ang giatiman sa mga evacuation centers sa kasamtangan.
Sumala sab sa LGU-Malalag Command Center, ilabihang nalunop sa tubig baha ang mga barangay sa Poblacion ug Bulacan diin napalgan ang mga nanga-stranded na mga pamilya.
Samtang sa search and rescue operation sa Barangay Pitu, narekober ang patayng lawas ni Evelyn Alon Matango, 52 anyos, ug usa ka pangulo sa tribo. Samtang napalgang samaran ang iyang asawang si Marcelino Saldua Matango, 51 anyos, usa ka Indigenous People Mandatory Representative.
Namatay sab sa maong pagbaha si Alex Zamora Buela, taga- Barangay Ibu ug dunay balatian sa pang-isip nga naanod sa kusog nga tubig baha. Narekober ang iyang patayng lawas sa Sitio Lusbak,Brgy.Bolton, Malalag, Davao del Sur.
Gideklara ang State of Calamity niadtong Nobyebre 17 sa hapon ilawom sa Resolution No. 2022-188 ni Mayor Peter Paul Valentin aron mapasidaan ang mga gipahigayong Search, Rescue and Retrieval Operation sa lungsod sa Malalag.
via || Bombo LJ Florendo
