Palapdan sa Philippine Health Insurance Corporation ang inpatient benefit package aron maapil ang pasyenteng ma-admit sa ospital sulod sa wala pay 24 oras, basta makapasar sa gitakdang kwalipikasyon ug requirements, sugod Sept. 18, 2026.
Ubos sa PhilHealth Circular No. 2026-0013, mahimong makapasa og reimbursement claim ang miyembro ug dependents bisan dili moabot og 24 oras ang ilang confinement. Apan kinahanglan nga ang kondisyon seryoso, grabe ug naghulga sa kinabuhi.
Matud sa PhilHealth, pagasusihon ang eligibility base sa medical necessity ug medical justification sa admission, nga suportado sa medical records. Apil sa coverage ang mga pasyenteng kinahanglan ipadayon ang pag-atiman sa laing ospital o namatay samtang naka-confine.
Apan dili sakop ang mga kaso nga dili kinahanglan og inpatient admission, lakip ang mga kondisyon nga mahimong matambalan sa outpatient, emergency department, ambulatory o primary care services. Dili usab sakop ang mga pasyenteng declared dead on arrival.
Gipasabot ni PhilHealth spokesperson Alfred Philip de Dios nga istrikto nga oras ang pag-ihap sa 24 oras, sugod sa panahon nga gi-admit ang pasyente. Magsugod ang pag-ihap sa oras sa admission order.
Tumong sa polisiya nga masulbad ang kakuwangan sa kanhing rules ug masiguro nga mabayran ang serbisyo nga gikinahanglan.
