DAVAO CITY- Patay ang giilang notado ug armadong kawatan human kining misukol sa gipahigayon nga operasyon sa kapulisan alas-10:25 niadtong nakalabay nga gabii sa Purok San Miguel, Barangay Centro, Agdao, Davao City.
Subay sa report, miresponde ang Sta. Ana Police Station sa lugar diin gikataho nga adunay naglatagaw nga armadong akyat bahay.
Gisulayan pa og dakop sa kapulisan ang hamtong nga suspek apan namatikdang nagdala kini og pistola ug kalit nga gihulbot kini. Apan, ayha paman siya makapabuto sa iyang armas, naunhan kini og pusil sa mga otoridad.
Gisulayan pa og dagan ang suspek sa Southern Philippines Medical Center (SPMC) apan gideklara kining dead on arrival.
Nakuha gikan sa suspek ang usa ka kalibre punto 38 nga pistola, mga bala, ug usa ka pakete sa gidudahang shabu.
Nasayran nga una nang nalambigit ang suspek nga giilang si Alyas Kenny sa kaso mahitungod sa iligal nga druga niadtong Agosto 2019 apan nakagawas kini.
Inay nga magbagong buhay, miapil na hinoon kini sa mga serye sa pagpangawat subay sa dugay nang gihimong monitoring sa kapulisan.
Samtang kahinumduman, gikananayon sa tigpamababa sa Davao City Police Office (DCPO) nga si PMaj. Catherine Dela Ray nga og dili kaya nga undangon ang susamang iligal ug dautan nga binuhatan, mas maayo nga muhawa na lamang diri sa siyudad tungod bilangguan lamang ang ilang tugpahan.
