DAVAO CITY- Giangkon ni Brgy. Capt. Doce Apostol nga daghan siya og nadawat nga mga reklamo labot sa mga iro nga latagaw sa ilang barangay.
Gikumpirma usab niini ang kamatayon sa mga iro sa ilang barangay nga posible matud pang gipanghiloan. Sumala pa ni Kapitan Apostol nga subay sa iyang nasayran, duha (2) ka mga iro sa Panacan Relocation ang namatay ug gituohan nga susamang mga biktima sa pagpanghilo human mikirig ug nagbula-bula ang baba.
Nagtuo usab si Kapitan Apostol nga posibleng mga kawatan ang mihimo sa paghilo sa mga iro aron walay mamugnang kasaba sa ilang himuon nga krimen.
Samtang isip tubag sa barangay sa reklamo sa mga residente batok sa mga latagaw nga iro, nakiglambigit na kini sa City Veterinarian’s Office (CVO).
Usa ka Information Education Campaign sumala pa ang ilusad alang sa mga tag-iya og hayop ayha ipahigayon ang pag-impound sa mga iro nga latagaw ug gipasagdan sa kadalanan.
Gitino sa barangay official nga delikado ang mga latagaw nga iro gumikan kay naghatud kini og kakuyaw nga makapaak ug kahugaw sa palibot.
Maghatag usab sumala pa ang City Vet og libreng anti-rabbies vaccine ug pagkapon sa mga iro ug iring.
VIA|| ANGIE CHAGAS
