DAVAO CITY- Subling gi-organisa sa lokal nga panggamhanan sa Davao ang Tourism Council sa Davao City.
Kini aron nga epektibong mapatuman ang mga katungdanan, gimbuhaton, ug masiguro ang pagpadayon sa mga plano alang sa pagpalambo sa turismo sa syudad.
Aron nga mapatuman kini, gipirmahan ni Davao City Mayor Sebastian “Baste” Duterte ang Executive Order No. 58, Series of 2022, o ang “An Order Reconstituting the Membership of the Tourism Council of Davao City”.
Subay sa EO 58 Section 18 sa Republic Act No. 7160 o ang “Local Government Code of 1991”, gihatagan og pagtugot ang mga LGUs nga magtukod og organisasyon nga mamahimong responsable alang sa epektibong implementasyon sa mga plano, programa, ug prayoridad sa syudad.
Ang nahisgutang Tourism Council ang gilangkuban sa city mayor isip chairperson diin representante niini ang assistant city administrator for operations; ug ang Sangguniang Panlungsod Committee on Tourism and Beautification chairperson ang mulingkod isip vice-chairperson.
Miyembro sab sa maong council ang mga hepe sa City Tourism Operations Office (CTOO), City Legal Office, City Planning and Development Office, Public Safety and Security Command Center, Department of Tourism Region 11, ug Association of Barangay Captains.
