DAVAO CITY – Nagpadayon gihapon ang pagpahingusog sa usa ka environmental group mahitungod sa posibleng kadaot sa kinaiyahang hatud sa Samal Island – Davao City Bridge.
Sa nahimong pakighinabi sa Bombo Radyo Davao kang ECOTENEO director, Carmelita Marie Santos, gikanayon nga maglusad ang pipila ka mga environmental groups ug usa ka local initiative nga mag-awhag sa tawo nga ipasusi pagbalik ang pag-apruba sa nahimong alignment sa maong tulay.
Dugay nang gikataho sa grupo nga dagko ang mamahimong epekto niini sa mga marine protected sites partikular na sa Barangay Hizon sa Samai Island diin ginahimo ang starting point sa proyekto.
Gikwestyon sab pag-usab ang naunang kumipirmasyon sa DPWH 11 nga patay na ang mga coral reefs sa Davao Gulf nga sukwahi sa nahimong inspeksyon sa DENR 11 nga buhi ang marine life sa maong kadagatan.
Gikahibulong sab ni Santos ang wala pagkonsidera sa mga contractors sa nahimong panukiduki sa JICA nga nagsugyot sa mas haum ug baratong alternative starting ug end points sa maong tulay.
Gipanawagan sab niya nga kinahanglang i-review ang kwestyonableng pag-isyu sa Environmental Certificate sa maong proyekto taliwala sa gagmayng kaalam mahitungod sa posibleng environmental damage sa ipahigayong construction sa tulay nga mahitabo sulod sa lima ka tuig.
Gihingusgan na karon sa grupo nga mangilabot na ang katawhan alang sa kaayuhan sa gilaumang proyekto.
Magpahigayon ug hearing ang Sanggunang Panglungsod sa Davao City mahitungod sa Samal – Davao Bridge sunod simana.
via || Bombo LJ Florendo
