DAVAO CITY – Nagmugna na ang panggamhanan sa dakbayan sa Davao ug usa ka Inter-Agency Task Group nga ginatutukan ang isyu sa commercial and quarrying operations diri sa dakbayan.
Sigun sa giaprubahan ni Davao City Mayor Baste Duterte nga Executive Order No. 54, Series of 2022, magpatuman na ug inspeksyon, exploration ug assessment sa matud pa ilegal nga pag-quarry nga maghatud ug kadaut sa kinaiyahan.
Subay sab kini sa Republic Act No. 7942 kon Philippine Mining Act of 1995.
Pagatutukan sab sa maong komitiba ang pagpahamtak ug silot sa mga quarry nga naga-operate nga walay pagtugotgikan sa panggamhanan.
Sakop sa ordinansa ang kaayong hatud sa mga quarry products sama sa balas, graba, boulders, earth fill, ug uban pang mga produkto alang sa mga proyektong imprastraktura sa dakbayan.
Manguna isip chairperson ang mayor, City Administrator’s Office isip co-chairperson, ug Mines and Geo-Sciences Bureau Region 11 isip vice chairperson sa buhatan.
Sa kasamtangan, adunay permit to operate ang mga quarry sites duol sa Davao River, Lasang River, Matina Pangi River, ug Talomo River.
via || Bombo LJ Florendo
