DAVAO CITY- Gikadismaya ug nakurat ang Police Regional Office 11 sa matud pa nahitabong pagpanghold-up nga gikalambigitan sa duha ka mga sakop niini nga na-assign sa Davao City Police Office.
Nasayran nga robbery with force and intimidation; ug paglapas sa RA 10591 o Comprehensive Firearm and Ammunition Regulation Act ang nahimo sa duha ka sakop sa kapulisan nga giilang sila P/Chief Master Sgt. Reynante Medina sa Foot Patrol and Bike Unit ug P/Master Sgt. Christopher Ararao sa Bunawan Police Office.
Nasayran nga nasikop sa kapulisan sa General Santos City ang mga suspek human nga gisulod matud pa niini ang balay sa usa ka negosyante nga giilang si Jacky Faeldin, 37-anyos ug residente sa Purok Ondok Gawan sa Barangay San Jose sa General Santos City ug gipangkuha ang mga personal nga mga butang niini ingon man ang mga cellphone ug kwarta nga nagkantidad og P165,000.
Subay sa maong panghitabo, gihingusgan sa PRO XI nga dili niini i-tolerate ang mga personahe niini nga malambigit sa bisan unsa mang acts of lawlessness o mga krimen.
Gipanaad sa buhatan nga mamahimong patas ug matinud-anon ang himoon niining imbestigasyon. Sa pikas bahin, gilayon nga gimando ni PBGEN BENJAMIN H SILO, JR, Regional Director sa PRO 11 ang pag-relieve sa nahisgutang mga personahe lakip na ang ilang mga immediate supervisors ug commanders. Samtang gihikay na sab ang administratibong kaso nga ipasaka batok sa mga nahisgutan.
