DAVAO CITY- Sikop ang usa ka mag-uuma atol sa gikasang joint Anti-illegal Drug “Buy-bust” operation sa mga sakop sa City Drug Enforcement Unit (CDEU) ug Intelligence Unit sa Digos City Police Station sa Sitio Sta. Ana, Quirino avenue, Brgy. Tres de Mayo sa nahisgutang syudad.
Giila ang dinakpan nga si Rodrigo Mengito Bernabat, alyas “BRO”, 40 anyos, minyo, usa ka mag-uuma ug residente sa Purok 1, Brgy. Ruparan, Digos City probinsya sa Davao del Sur.
Narekober gikan sa posisyon sa suspek ang upat ka pakete sa gitouhang shabu, usa ka libo ka pesos nga gigamit nga buy-bust money, usa ka cellphone ug usa ka pakete sa sigarilyo.
Gibana-banaang muabot sa .47 grams ang gimbug-aton sa nakumpiskang iligal nga druga nga adunay street market value nga P7,050.
Gikustodiya na karon sa Digos City Police ang dinakpan ug gikatakdang pasakaan og kasong paglapas sa RA 9165 o Comprehensive Dangerous Drugs Act of 2002.
