DAVAO CITY- Sikop ang usa ka babaye atol sa gikasang buy-bust operation sa Marilog Police Station human nga naaktohan kining nalambigit sa pagpamaligya og iligal nga druga.
Ang dinakpan ang giilang si Miraflor Soson Buhisan alyas Dayday, 28 anyos ug residente sa Los Amigos, Tugbok District ning dakbayan sa Davao kansa nasikop sa usa ka payag sa Lower A, Brgy. Tamugan, Marilog District.
Sikop ang suspek human nga positibo kining napalitan og shabu sa usa ka poseur buyer. Nakumpiska gikan sa posisyon sa dinakpan ang usa ka sachet sa gikatouhang shabu ingon man ang buy-bust money.
Nakuha sab sa WALA nga dughan sa dinakpan ang gisuksok niini nga brown wallet nga adunay kwarta. Gibana-banaang anaa sa ubos usa ka gramo ang gimbug-aton sa iligal nga druga ug adunay kantidad nga anaa sa P500.
Gikustodiya na karon sa Marilog Police Station si alyas Daday ug gikatakdang pasakaan og kasong paglapas sa RA 9165 o Comprehensive Dangerous Drugs Act of 2002.
