DAVAO CITY- Subling gipadayag sa Apo Agua ang ilang commitment nga maghatud og bastanteng suplay sa tubig ngadto sa ilang partner nga mao ang Davao City Water District (DCWD) atol sa unang quarter sa musunod nga tuig 2023.
Gikanayon ni May Che Capili, external relations officer sa Apo Agua, niadto lamang nakalabay nga semana, nagbaton sila og panagtagbo tali kang Davao City Mayor Sebastian ‘Baste’ Duterte.
Sa mga panagtagbo, gipanaad sa Apo Agua nga mahatud ang 300 million ka litro sa tubig matag adlaw ngadto sa Davao City Water District.
Sa pagkakaron, subling gisugdan sa Apo Agua ang ilang 24/7 nga konstruksyon sa Davao City Bulk Water Supply Project human nga kini ang nalangay sa taas nga panahon.
Gikanayon ni Capili nga sa nakalabay nga mga panahon, daghanang mga problema ang gisagubang sa Apo Agua Construction sa Bulk Water Project nga maoy hinungdan sa pagkahunong niini sama na lamang sa COVID-19 Pandemic ug ang kanhi construction partner niini.
Sa pagkakaron, ang Apo Agua na amismo ang naghupot sa kinatibuk-ang proyekto. Atol sa 1st quarter sa 2023, target sa Apo Agua nga mahatud ang pagsuplay sa tubig sa Tugbok Water District Reservoir ug isunod usab nii ni sa pagsuplay atol sa 2nd quarter sa 2023 ang lain pang pito ka mga optic points o water reservoir sa Calinan, Talandang,Mandug, Indangan, Cabantian, Panacan ug Dumoy.
