DAVAO CITY- Hingpit na nga gideklarang “insurgency-free” ang probinsya sa Davao Oriental kini human sa mga malampusong gipahigayon nga peace and order interventions nga miresulta sa pagka-dismantle sa nahabiling sakop sa teroristang New People’s Army (NPA).
Atol sa Provincial Peace and Order Council meeting nga gipahigayon sa Mati City, nagkahiusa ang tanang sakop sa konseho sa pag-apruba sa usa ka resolusyon nga nagdeklara sa Davao Oriental isip insurgency-free ug development-ready nga probinsya.
Subay sa impormasyon gikan kang Brigadier General Oliver Maquiling, Commander sa 701st Kagitingan Brigade, totally dysfunctional na ug dismantled na ang Weakened Guerrilla Front 18 diin duha na lamang ka mga miyembre niini ang nahabilin.
Dugang pa ni Maquiling, gawas sa pagpahigayon og focused military operations, lakip usab sa rason niining maong kalampusan ang panaghiusa sa mga ahensya sa gobyerno sa pagpatuman sa nagkadaiyang programa sa kalinaw ug kalamboan.
Usa na niini ang daghanang mga proyekto ilalom sa Ending Local Communist Armed Conflict (ELCAC) kansa naghatud og high-impact projects sama sa kalsada, water systems, mga tuloghaan, livelihood projects ug uban pa alang sa komunidad.
Ang insurgency-free declaration ang base sa resulta sa evaluation ug validation nga gihimo sa AFP-PNP Joint Area Clearing Evaluation Board (ACEB) ug sa AFP-PNP Joint Area Clearing Validation Committee (ACVC) ug gikatakda kining ipasaka sa national level alang sa kumpirmasyon ug final approval.
