DAVAO CITY – Mukabat sa kapin P1.2 million ang kantidad sa mga nakumpiskang tulo ka libo nga buhing tanom sa marijuana nga gipang-ibot ug gipangsunog sa mga sakop sa Regional Police Drug Enforcement Unit 11 atol sa operasyon nga gipahigayon sa may Sitio Lamkua, Barangay Tacub, Kiblawan, Davao del Sur sa miaging adlaw.
Gikumpirma ni Police Captain William Catipay sa pakighinabi sa Bombo Radyo Davao nga gituyo ug tanom ang mga punoan sa marijuana tunga sa mga maisan ug uban pang mga pananom sa lugar aron dili kini daling maplagan sa mga otoridad.
Nahimo sab kining hideout sa suspek nga si alyas “Sutil” tungod sa kamingaw sa palibot ug kalay-on sa lugar gikan sa sentro sa munisipalidad sa Kiblawan.
Si alyas “Sutil”, usa ka myembro sa tribong B’laan ug top 6 high value individual nga miikyas atol sa nahitabong operasyon.
Gihikay na sa RDEU 11 ang kasong ipasang-at batok sa suspek nga kasamtangang gipangita na karon sa mga otoridad.
VIA || Bombo LJ Florendo
