DAVAO CITY – Anaa sa 1,099,841 ang kinatibuk-ang ihap sa mga estudyante sa Davao Region ang nakapa-enroll na alang sa school year 2022-2023.
Kini subay sa bag-ohay lamang gipagula nga LIS Quick Count sa Department of Education (DepED) XI as of August 17, 2022.
Ang maong ihap ang 79% sa gidaghanon sa official enrollment sa nakalabay nga school year 2021-2022 nga anaa sa 1,395,893.
Ning kasamtangan, mukabat na sa 550,306 ka mga batang lalaki ang nakapa-enroll samtang 549,535 ang gilangkuban sa mga babaeng estudyante.
Alang sa Kinder, anaa sa 69,980 ang nagpa-enroll sa public schools samtang 5,253 ang nagparehistro sa private schools.
Alang sa Elementary Level, anaa sa 480,373 ang enrollees alang sa pampublikong tulonghaan ug 24,030 alang sa pribadong tulonghaan.
Sa pikas bahin, anaa sa 319, 123 ka mga enrollees alang sa Junior High School ang nagpa-enroll sa Public schools ug 33,177 alang sa private.
Samtang sa Senior High School, anaa na karon sa 120,475 ka mga estudyante ang nagpa-enroll sa pampublikong skwelahan ug 47,430 alang sa pribadong eskwelahan.
