Gibutyag sa City Health Office (CHO) nga andam na kini sa posibleng pagsulod sa Monkeypox sa nasud. Ubay-ubay ka mga estratihaya ang gihimo sa unit sa team sa Emerging and Re-emerging Infectious Diseases sa CHO nga maoy responsable sa emergency response planning ngadto sa mga makatakod nga mga sakit sama sa COVID-19 ug Monkeypox.
Saysay pa ni Kristy June Dayanan, Program Manager sa CHO ug pangulo sa EREID unit, atol sa I-Speak media forum niadtong Huwebes nga ang ilang contingency plan naglakip sa usa ka kasabutan uban ang Southern Philippines Medical Center (SPMC) sa paghikay sa isolation facility alang sa mga pasyente sa Monkeypox.
Dugang pa, ang maong isolation area alang sa immunocompromised nga labing mataptan sa impkesyon sama sa mga pasyente nga nagpa-dialysis ug mabdos, ibutang usab kung adunay outbreak sa sakit. Lakip usab sa contingency plan ang pagpahimutang sa mga higdaanan sa Intensive Care Unit, Obstetrics ug Gynecology isolation facility.
Matud pa ni Dayanan nga ang EREID kauban ang Health Care Medical Management System sa CHO andam na kung adunay impeksyon sa Monkeypox sa siyudad.
Nagsugod na usab ang CHO sa pagbansay sa samang healthcare personnel nga miresponde sa COVID-19 sukad ang siyudad nakadawat og Monkeypox surveillance advisory gikan sa Department of Health niadtong Mayo.
Sa ikaduhang bahin, miingon sab si Dayanan nga gamay ra ang posibilidad nga makasulod ang maong sakit sa dakbayan tungod hugot ang monitoring ug surveillance nga gipatuman sa Bureau of Quarantine ug Civil Authority of the Philippines.
Via || DAVID FRANCISQUETE
