DAVAO CITY – Nag-andam og isolation room nga adunay negative pressure ang Southern Philippines Medical Center (SPMC) isip usa ka strategy ugaling adunay pasyente nga makitaan og Monkey pox dinhi sa syudad.
Sa maong isolation room ibutang ang mga pasyente nga adunay emerging infectious disease diin una na kining gihimo sa maong balay tambalanan kaniadto pa nga adunay Ebola Virus , H1N1, ug Avian Flu.
Sa eklusibong pakighinabi sa Bombo Radyo Davao kang Dr. Ricardo Audan, Hepe sa SPMC, gikanayon niini nga makuha ang monkey pox gikan sa infected nga hayop o dili ba kaha human to human transmission pinaagi sa droplets, habol sa infected nga migamit, ug sexual contact sa mga nagpositibo sa monkey pox ug ingon man pinaagi sa abli nga samad.
Dugang pa ni Audan nga mulungtad og lima ngadto na sa 21 ka adlaw ang incubation period niini o ang stage kung asa ga-develop pa ang virus sulod sa lawas nga walay sintomas nga masinatian.
Human niini, mulungtad og usa ngadto sa 4 ka adlaw diin asa nagsugod na ang mga sintomas sama na lamang sa kalintura, sakit sa ulo, sakit sa tuntulan, sakit sa kalawasan , ug fatigue nga susuma sa sintomas sa flu.
Samtang, muabot sa duha ngadto sa upat ka semana kung asa manggawas ang mga rashes nga susuma sa small pox.
Apan, sumala kang Dr. Audan, dili delikado ang monkey pox kung itandi sa small pox, apan usa kini ka global health concern bisan paman dili kaayo kini fatal.
Kahinumduman nga niadtong Hulyo 28, 2022, nakatala na ang Pilipinas og labing-unang kaso sa Monkeypox , human migawas nga positibo sa RT-PCR test ang usa ka 31 anyos nga pilipino nga gikan sa abroad nga adunay kaso sa Monkey Pox.
Gipailalom sab kini sa DOH sa hugot nga home isolation lakip na ang uban pang napulo ka tawo nga close contact niini ang gipailalom sab sa 14-21 ka adllaw nga home isolation tungod wala kini nakitaan og sintomas.
Via || Hana Rallos
