DAVAO CITY – Mi-ubos pa ang edad sa mga nabiktima sa nahitabong diarrhea outbreak sa Toril District ning syudad diin subay sa datos nga natala, anaa sa tulo ka bulan nga masuso ang nagka-diarrhea.
Sumala kang Dr. Ashley Lopez, City Health Office head, mao na kini ang pinakabatang pasyente nga apektado sa outbreak diin kahinumduman nga unang natala niadtong milabay nga adlaw ang 6 months old na baby nga nagka-diarrhea.
Samtang, pinaka-edaran sab nga nagkasakit ang anaa sa 69 anyos.
Gitutukan pag-ayo karon sa City Health Office ang kahimtang sa tulo ka bulan nga masuso aron masiguro nga dili mabutang sa alaut ang kinabuhi niini.
Gumikan sa padayong nagkadaghan nga ihap sa mga apektado, subling nagpahinumdom ang CHO ngadto sa mga residente sa maong lugar nga aron mas luwas, pabukalan una ang tubig ayha inumon o gamiton.
Mas maayo matud pa kining himoon isip kabahin sa preventive measure samtang ginapaabot pa ang resulta sa gipahigayong independent water analysis sa buhatan.
