DAVAO CITY – Misaka pa sa 147 ang kumpirmadong kaso sa nahitabong diarrhea outbreak sa 19 na ka mga apektadong barangay sa Toril District ning dakbayan sa Davao.
Diin, usa ka 10 anyos nga batang lalaki ang kumpirmadong patay gumikan sa severe diarrhea nga misantop sa severe dehydration.
Samtang, mi-ubos pa ang edad sa mga nabiktima gumikan subay sa datos nga natala, anaa sa 3 months old nga masuso sab ang nagka-diarrhea.
Gitino ni Davao City Health Office Head Dr. Ashley Lopez nga wala pay analysis sa test result gikan sa sample sa tubig, pagkaon ug rectal swab nga gipa-laboratoryo sa CHO.
Aduna matud pay migula nga result sa water sample apan partial pa kini.
Gawas sa nagpadayon nga monitoring sa CHO, gi-andam sab nila ang tabang alang sa mga biktima sa diarrhea ilabi na sa namatay nga 10 anyos nga batang lalaki.
Ning kasamtangan, nagpahigayon sab og independent water test ang CHO kauban ang Department of Health aron madetermina ang hinungdan sa Outbreak.
Kahinumduman, una nang gi-anunsyo sa Davao City Water District nga nakompleto na ang ilang water sampling and testing nga gihimo sa napulo ka water station sa Puan, Bago Gallera, Baliok, Bago Aplaya, ug Toril Areas diin asa natala ang daghang biktima sa diarrhea.
Base sa resulta, gikanayon sa DCWD nga nag negatibo sa E. Coli ug coliform ang ilang tubig.
Sa karon, padayon pang ginasusi kung food borne disease o waterborne disease ang hinungdan sa outbreak.
