DAVAO CITY – Gipaklaro sa Department of Environment and Natural Resources-Davao Region nga wala na-isyuhan og “notice to proceed operation” ang mining company nga responsable sa pagbuswak sa hugaw nga tubig gikan sa mining site padulong sa Mapagba River ug sa mga coastal areas sa Banaybanay, Davao Oriental karung tuiga.
Gikanayon ni DENR-Davao Director Bagani Evasco sa usa ka press conference nga gihatag na ang Cease and Desist Order ug Notice of Violation ngadto sa Arc Nickel Resources Inc.
Matud pa sa direktor nga aduna’y kalabutan ang ilang operasyon sa pagkahugaw sa suba sa Mapagba ug tungod sab sa sagunsong pag-ulan sa tibuok Davao Region sa miaging mga adlaw.
Nagapadayon gihapon ang rehabilitasyon sa maong suba.
Sa report nga gipagawas ni EMB-Davao Director Engr. Mario Bulacan, gipasaka na ang tulo ka mga kaso ilawom sa Environmental Compliance Certificate ug aduna’y penalty nga muabot sa P50,000 matag usa.
Mag-atubang sab sila og kasong paglapas sa Republic Act 9275 o ang Clean Water Act.
Via || LJ Florendo
