Davao City – Ipatuman sa San Pedro Cathedral ang One Entrance – One Exit Policy alang sa ipahigayon nga inaugural mass atol sa oath taking ceremony ni Vice President-elect Inday Sara Duterte-Carpio karong adlaw nga domingo, Hunyo 19, 2022.
Mismong si Vice President-elect Inday Sara ang nagkanayon nga abri alang sa tanan ang nahisgutang misa nga magsugod alas 3 hangtud alas 4 sa hapon.
Dugang pa sa outgoing mayor nga human sa misa, magbaton kadali og usa ka photo opportunity sa archbishop, bishop, monsignor ug mga pari.
Gikanayon sa adminstrador sa simbahan nga regular mass ang tambungan ni Inday Sara hinungdan nga wala gilimitahan ang mga tawo nga makatambong sa misa basta mosunod lamang sa minimum health protocol partikular na ang pagsul-ob og facemask.
Gitambagan usab sa simbahan ang mga ginikanan nga dili magdala og mga gagmay nga bata sa pagtambong sa inaugural mass ni VP-elect Sara Duterte.
Samtang, ikansela na usab sa simbahan ang misa sa mosunod nga duha ka mga regular mass nga ipahigayon alas 4:15 sa hapon ug alas 5:30 sa hapon ug ang inaugural mass ni Mayor Inday sara sa alas 3 sa hapon mao ang katapusan nga misa sa adlaw nga Domingo, Hunyo 19, 2022.
Samtang, pormal usab nga himuon ang oath taking ni VP elect Sara Duterte pagka-alas 4:30 hangtud 5:30 sa hapon ug sundan kini sa musikahan at pasalamat sugod alas 6 sa gabii sa San Pedro Square.
