DAVAO CITY – Gikatakdang ilusad sa lokal nga kagamhanan pinaagi sa Davao City Environment and Natural Resources Office (CENRO) ang tulo ka mga recreational parks nga nahimutang sa Barangay Communal, Barangay 76-A Bucana, ug sa Barangay Los Amigos ninig dakbayan sa dabaw diin gikatakdang abrihan sa publiko sa dili pa mahuman ang tuig kasamtangang 2022.
Kini ang magsilbi nga dugang sa kasamtangang nag-operate na nga 22 ka mga parks sa syudad karong panahona.
Gikanayon ni CENRO Head Engr. Marivic Reyes ang nahigutang tulo ka mga bag-ong public parks ang hingpit nang nahuman ug sa dili madugay mamahimo na kining mag-operate ngadto sa publiko.
Dugang pa ni Engr Reyes nga moabot sa P8,881,000 ang pondo nga gi-alokar alang sa park sa Bucana; P12 million usab sa Communal ug kapin sa 26 milyon ka pesos usab sa Los Amigos park.
Gikanayon ni Reyes nga gituyo sa pagpatukod ang nahisgutang mga park sa mga dapit nga giilang populous district sa dakbayan, subay na usab sa comprehensive development plan sa syudad alang sa public land use ug aron masiguro nga sayon lamang alang sa tanang mga dabawenyos ang makasuroy sa mga public recreational amenities.
Samtang, 65% na usab ang completion status sa ika-upat ug pinaka-dako nga public park nga naa nahimutang sa Doña Vicenta Village nga adunay budget allocation nga P82,567,000.
Lakip na niini ang usaka proposed greenway park sa Roxas Avenue ug ang lain latas sa bisinidad sa coastal road.
Ang katukuran sa nahisgutang mga proyekto ang subay na usab sa tumong sa lokal nga kagamhanan nga himuon ang dakbayan sa dabaw nga labing nindot nga luigar nga kapoy-an ug nindot nga kasuruyan sa mga bata ug sa ilang mga pamilya.
