Gibutyag sa Office of the Ombudsman nga dili “eraser” ang recantation o pagbawi sa pahayag sa testigo aron awtomatikong mapapas ang naunang mga ebidensya sa mga kaso sa flood control batok kang kanhi House Speaker Martin Romualdez.
Gipahayag ni Assistant Ombudsman Atty. Mico Clavano nga dili mahimong gamiton ang pagbawi sa pahayag isip paagi aron mapapas ang kamatuoran nga nasulti na sa usa ka testigo.
Sumala pa ni Clavano, susihon ug itandi ang unang pahayag ug ang ikaduhang pahayag aron matino kung asa ang mas kasaligan ug nahiuyon sa ubang ebidensya sa kaso.
Dugang pa niini, gihulagway ni Clavano nga “misleading” ang pag-ingon nga awtomatikong adunay dakong epekto sa kaso ang pagbawi sa pahayag sa pipila ka mga testigo.
Gipunting usab niini, nga ang maong recantation mahimo nga magsilbing dugang nga ebidensya nga pagabasihan sa mga imbestigador sa pagtino sa kamatuoran.
Sa kasamtangan, nagpadayon ang mga reklamo batok kang Romualdez sa Office of the Ombudsman, lakip ang plunder, direct bribery, graft ug money laundering nga may kalabotan sa giingong anomalya sa mga proyekto sa flood control.
